كيف ترتب سفرة بأقل التكاليف؟

ودك تسافر برا المملكة وتغيّر جو وتبعد عن الالتزامات والدوام والروتين؟ اخترت الديرة اللي تبي تروح لها وبحثت عنها في النت عشان تتحمس وحددت الأماكن اللي تبي تزورها؟ طيب كم بتكلفك ذا السفرة؟ كم تحتاج عشان تغطي المصاريف اليومية في السفر؟ ومتى تقدر تسافر؟ طبعاً تكاليف السفر تختلف بحسب الطريقة والترتيبات اللي تسويها، عشان كذا لازم تجهز من بدري ميزانية خاصة بالسفر.

بنعطيك هنا 5 حاجات تساعدك في تخطيطك للسفر بأقل التكاليف.

التنقل

من أهم الأهداف اللي يحرص عليها الواحد في السفر هي انه يزور الأماكن اللي كان حاط في باله انه يزورها وعشان كذا لازم يحسب المبالغ اللي يحتاجها في التنقلات هذي سواء كانت تذاكر طيران، قطار، حافلات، أو حتى تاكسي. وبالنسبة لتذاكر الطيران تقدر تاخذها بأقل سعر إذا حجزت وشريت التذاكر بدري، تقدر بعد تقلل تكلفة التنقل الداخلية اذا استخدمت المواصلات العامة بدال التاكسي أو السيارات الخاصة.

السكن

يمكن يكون للسكن نصيب الأسد في ميزانيتك وهذا يعتمد على المكان اللي تختاره. طبعاً اختيارك للمكان بيكون يعتمد على أشياء كثيرة مثل الراحة والأمان والقرب من المعالم السياحية، غير كذا للسكن نفسه خيارات كثيرة مثل الشقق أو الفنادق أو غيرها من الخيارات. بعد ما تحدد اللي يناسبك من كل هذا تجي مرحلة مقارنة الأسعار عشان تختار السكن اللي يناسبك بسعر أقل.

الأكل

حلوة فكرة انك تجرب أكلات وأطباق عالمية جديدة عليك لكن برضو حط في حسابك المبالغ اللي راح تدفعها. يعني مثلاً لو كنت مسافر لغرب أوروبا أو أستراليا أو نيوزيلندا، بتطلع عليك التكلفة تقريباً نفس اللي في أمريكا أو كندا. عشان كذا حاول تدوّر مطاعم تقدم نفس الخدمة او الأكلات بس بسعر أقل.

الأنشطة الترفيهية والطلعات

أياً كانت البلد اللي انت رايح لها بيكون عندك خطة للأنشطة الترفيهية مثل زيارة المتاحف او المنتزهات، أو ممارسة بعض الرياضات مثل الغطس أو التزلج وغيرها. عشان كذا لازم يكون عندك ميزانية خاصة بذا الأنشطة. وإذا كنت تحب انك تسوّق، حاول تدوّر الأسواق المحلية اللي تبيع المنتجات والهدايا التذكارية بأقل الأسعار.

أوقات ومدة السفر

أكثر الناس يربطون سفرتهم بالأيام اللي تكون مناسبة للعائلة كلها، يعني لما تبدأ العطلة الدراسية للأولاد يحاولون الوالدين انهم ياخذون إجازة في نفس هالوقت ويتفقون على الأماكن اللي بيزورونها وعدد الأيام اللي تكفيهم في هالسفرة مثل انهم يحددون يوم الوصول ويوم المغادرة وأيام التنقل بين المدن. والاهتمام بالتفاصيل هذي يفكك من الزنقات اللي ما لها داعي ثم تضطر بسببها انك تمدد اجازتك وتدفع رسوم زيادة وتجلس وقت أكثر من اللازم.

وفي نفس وقت السفر، بيكون كويس لو سجلت كل مصاريفك عشان تعرف إذا كانت ميزانيتك مضبوطة ولا لا، وراح يساعدك التسجيل على انك تنتبه لمصاريفك وتقللها.

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.